Titeggarin n Lɛahd Ajdid
Azal n yeḍrisen n Tira
D acut wazal sɛan weḍrisen n Tira ? A d-nini amek alarmi uklalen a namen yis-n. D acut wazal-nsen i teflest ? D acu-t wazal-nsen amezray.
Adlisen n “Lexbaṛ n Lxir”. Neɣ “Linǧil”
Akken i ɣ-d-yewweḍ wedlis n Lɛehd Ajdid, akken i t-nessen, deg-s 27 n yeḍrisen yuran s tutlayt tagrigit. Yal aḍris yettusemma d “Adlis”. Nezmer a d-nini, xemsa-nni n yeḍrisen imezwura, d iḍrisen yuran s wudem n umezruy, deg-sen tidyanin d wussan d wayen yeḍran. D tidyanin n umezruy. Rebɛa deg-sen d wid yettusemman adlisen n “Lexbaṛ n Lxir”. Adlis n Marqus, Matta, Luqa d Yuḥenna. Yal yiwen deg-sen yettawi-d ɣef Linǧil, d isallen yessefraḥen, d izen i yemdanen yeɛnan tikci n Yillu. Tirza-ines ɣer ddunit. Ḥekkun-d amek i d-yusa Yillu ɣer yemdanen. Amek i d-ibeggen iman-is di Lmasiḥ iwakken ad isellek talsa si ddnub d tucḍa.
Amidag n Lmasiḥ ɣer useggas n 30
D ayen yellan deg umezruy, aṣemmer n Lmasiḥ ɣef umidag yella-d di leǧwahi n useggas wis 30 n talit-nneɣ. D ayen ara naf deg adlis n Luqa (Luq 3:1). Yettawi-d ɣef leqdic n Yeḥya Aɣeṭṭas i d-yusan kra n lweqt kan uqbel taɣlift n Lmasiḥ. Ayagi meṛṛa yella-d di lawan i deg yeḥkem Tiberyus. D aseggas wis 15 n tgelda-ines. Tebda tgeldit-ines deg seggas n 27 n talit-nneɣ. Tiberyus yuqel d amenkad deg seggas n 14, deg aggur n ɣucṭ. Tlata iseggasen ara yeḍrun di tneɣlaft n Lmasiḥ, alamma d lɛid n izimer, tafeska-nni tis tlata ara d-yilin deg useggas wis 30. Dinna ara d-ili tedyant n umidag.
Titeggarin timezwura yellan d tiqdimin yakan, d tibṛatin i yura Bulus s yiman-is. Tid meṛṛa yura uqbel ad yili d ameḥbus di Ṛuma, ger useggas n 60 d useggas n 62. Nufa belli azal n ɛecra n tebṛatin yura-tent ger usaggas n 48 d useggas n 60. D iḍrisen imezwura meṛṛa n Lɛehd Ajdid.
Deg uḍris iɛeddan, anda i d-newwi ɣef tnagit n Bulus, nessaken-d udem d umezruy n wergaz-agi, i yellan d amyaru meqqren, d iminig ger leǧnas, yeǧǧa-d aṭas n tiktiwin d uselmed n teflest tamasiḥit, yerna s tira-ines daɣen i yettunefk lsas n « Tira » n Lɛehd Ajdid. Degmi, deg uṭun-agi wis 5 ɣef titeggarin n Lɛhed Ajdid, a d-nawi ɣef Tira i d-yeǧǧa umceggeɛ Bulus. D ttbut iṣeḥḥan i s ibeddent « Tira » n Lɛehd Ajdid.
