Lmasiḥ Mmi-s n Ṛebbi, d talɣa yessewhamen acḥal d amdan. Kra n yemdanen staqsayen ad fehmen am akter, kra nniḍen ggumman ad qeblen ayagi, wiyyiḍ tɛjben kan qqimen ttmeyyizen deg-s.
Yal amdan yettnadi ad yamen!
Ulac amdan di ddunit, si sik ar tura, ur nuzzel ara ɣer ddin. Yalukan a t-id yesnulfu s ixemmimen-is. Tikwal a t-nwali iteddu si ddin ɣer wayeḍ, si lɛadda ɣer tayeḍ, seg xayel ɣer wayeḍ. Amdan yezga yettnadi amek ara yaf liser d ṭmana i tudert-is d laxeṛt-is. Amdan d adeyyani. Yuḥyaǧ ad yamen s kra n “urebbit”, s kra n “tezmert”. A ten-yeɛbed, a d-yessirem ɣur-sen iwakken ad yaf iswi d unamek i tudert-is.
Asteqsi-agi icud ɣer umezruy unṣib i yersen s iduba d imagrayen d-yellan si zik. Am akken timura d yegduden n wanẓul, ladɣa timnaḍin n usamar d tid n tefriqt ugafa d sseḥra, nutenti teddunt s ddeyyana tineslemt, mada gella d tid n ugafa d utaram s umata, nutenti ad ilint kan d timasiḥiyin. Yella-d wudem-agi n tmuɣli am akken s wakka i tetteddu dunnit.
Akken kan yecceḍ wemdan di tazwara, Ṛebbi ur t-yeǧǧa ara akkenni mebla lweɛd. Yeqsed si tazwara ad yefk amsellek. Deg ixf wis tlata di Laṣel n ddunit, issers-d lweɛd-agi n umsellek ara d-yasen. ( Laṣel n ddunit 3: 15 aked 21). Mi yfaq wemdan belli yecceḍ, yeɛreḍ ad iṣṣer iman-is s ifassen-is, s lecɣal-is. Ma d Ṛebbi, netta yessels-as, iṣṣer-it s weglim, s wesfel amezwaru yakan. Ilaq imiren ad yemmet uɣersiw seg ara s-d-yefṣel aglim-nni i s ara t-yeṣṣer. Ayagi yakan d tikci sɣur Ṛebbi, d asfel i d-ihegga si tazwara.
Si tazwara di Tira Iqedsen, yella-d wawal ɣef yemdanen ara yidiren di rrezg d lehna.
A d-lhin d lxedma, ad ḥadren ɣef ayen akk i sen-d-yezzin. Ad ilin di liser wway gar-asen. Am argaz am tmeṭṭut, ad ilin ttɛicin s tudkli d leḥmala, d lemqadra. Yernu ad ilin teddun ddaw leɛnaya n “Win” akken i ten-id-ixelqen. Illu yeddren.
Adlis n Tira Iqedsen, umi qqaren s tefṛensist «La Bible», aẓar-is si tegrigit “Biblos” lmeɛna-ines “Adlisen”. Deg adlis n Tira Iqedsen nnejmaɛn-d 66 n yedlisen yedduklen di sin yeḥricen. Lɛehd Aqdim d lɛehd Ajdid. Deg-sen yiwen n yizen. D «Awal n Yillu » i yemdanen. D tamsisit yesbed ger-as d talsa. Iswi-ines di Lmasiḥ.
D asteqsi n tugget n yemdanen ɣef ayen yeɛnan taflest tamasiḥit. D liman s yiwen n Ṛebbi. D Illu yeddren, ixelqen igenwan lqaɛa d wayen akk yellan deg-sen. Ur yesɛi tilisa ur yesɛi acrik neɣ amɛawen. Ulac i s-izemren, kullec yella ddaw leḥkem-is d tezmert-is. D ameɣlal, tageldit-is ur tfennu.
Illu yellan d anezmar, amek ara d-ilal si tmeṭṭut ?
D yiwen seg adrigen n teflest tamasiḥit. Imi Tira Iqedsen hedrent-d ɣef Yillu i d-ibanen di talsa di lǧetta n Mmi-s, yellan d Lmasiḥ. Illul-d si Meryem, yusa-d ad yili d amsellek n yemdanen. S lmut-is d ḥeggu-ines ass wis tlata si ger lmeyytin. D sser meqren ! Ṛebbi anezmar a d-ibin deg umdan-nni ara d-ilalen si tmeṭṭut !
D asteqsi i d-yettuɣalen di yal tikelt i deg ara nemmeslay ɣef ayen yeɛnan Linǧil d uselmed n Lmasiḥ. Imi nuɣ tanumi nettawi-d ɣef "Awal n Ṛebbi", aṭas ɣur-sen ad yili kan d yiwen n uselmed ara yilin deg yiwen wedlis kan.
Tadyant n ḥeggu n Lmasiḥ si ger lmegtin d tin ara yebnun asirem n teflest. D lewhayem, mačči d ayen ara yeqbel leɛqel. D tazmert n Ṛṛuḥ Iqedsen i d-issekren Lmasiḥ si lmut. D afus n Ṛebbi ara d-yennalen tudert. A tt-id yerr i Lmasiḥ, ad tfeggeḍ, a d-nfel ɣef wid meṛṛa ara yamnen s Lmasiḥ.
D ayen i d-yewwi lḥal a t-yefhem yal amdan yumnen s Lmasiḥ d amsellek-ines. Ayen akk icudden ɣer wazal n leslak di Lmasiḥ. Azal n tudert ddaw leɛnaya-ines d ṛṛeḥma-ines. Yal amasiḥi ad yili d win yumnen s Ṛebbi yeddren win ixelqen igenwan d lqaɛa d wayen akk yellan deg-sen. Tudert akk sɣur Yillu i d tekka yerna ɣer ɣur-s ara tuɣal.
Yeqqim akken i laẓ i fad, s tiyyita d rregmat. Yerna sbubben-as amidag-nni i ɣef tsemmṛen. Ulayɣer d nenna acḥal iqeṛṛeḥ usemmer-nni ɣef umidag. Yerna ayenni meṛṛa di lbaṭel. Deg ass-nni, yeɣli-d ṭṭlam deg zal. Tewwet zlezla di Yirucalim. Iẓekwan llin. Ffɣen-d ula d lmeggtin. Ayagi yeṣṣaweḍ yiwen userdas n Ṛṛuman ad yini : « S tidett aragaz-agi d Mmis n Ṛebbi ! » Uqbel ad yessufeɣ taṛwiḥt, yenna-d Lmasiḥ kra n imeslayen yesɛan azal i leslak ara yennekmalen s wesfel-ines.
Amek ara nefhem izen n Tira?
Tira iqedsen, ama d lɛehd ajdid ama d lɛehd aqdim, d awal d lewṣayat d yeǧǧa Yillu i yemdanen. Ayagi meṛṛa yennejmaɛ-d deg yiwen n wedlis yettusemman Adlis n Tira Iqedsen. S tefransist qqren-as i wedlis-agi, "La Bible". D ameslay i d-yekkan si tegrigit d tlaṭinit, "Biblia". Anamek-ines, "Adlis".
Tinettit n Lmasiḥ d tin icudden ɣer wayen yellan di Tira iqedsen. Imi di Tira ara naf ayen akk i t-yeɛnan. Talalit-ines ɣer ddunit s Ṛṛuḥ iqeden, tudert-is meṛṛa yellan d tin yennekmalen s tezdeg d tmusni. Leɛqel-ines yennekmalen i deg ulac akk kra n lexṣaṣ. Iɛac ger yemdanen mebla ddnub. Yeččuṛ s Ṛṛuḥ Iqedsen. Lecɣal-is d ixemmimen-is rekmen s leqdasa n Ṛṛuḥ.
Azal amezwaru akkit di leɛbada n Yillu yili d taẓallit. Di lebɣi n Ṛebbi i tella, yerna d Ṛṛuḥ iqedsen i yettwellihen ul n yal amdan iwakken ad iɛenni ad yedɛu s leɛnaya.
Adlis n Tira iqedsen yettawi-d ɣef Ṛṛuḥ Iqedsen yellan s nettit-ines d Ṛṛuḥ n Ṛebbi, d Illu s yiman-is. Sɣur-s I d-tekka yal tudert. Imi ayen akk I d-yexleq Ṛebbi, ixleq-it-d s Ṛṛuḥ-is. Linǧil daɣen yeqqar-d deg awal-is, Ṛṛuḥ Iqedsen s yiman-is d Ṛṛuḥ n Lmasiḥ. Yettusemma d imqeddes, d netta I yessizdigen tudert n yemdanen. Yettheggi ulawen-nsen d ixemmimen-nsen, ixeddem deg-sen. D Ṛṛuḥ n Ṛebbi s tezmert-is meṛṛa.
Awal-agi n umasiḥi icud yer yisem n Lmasiḥ s yiman-is. Si tazwara ttusemman inelmaden imezwura s yisem-agi, d imasiḥiyen, deg adlis n Lecɣal n yemcegɛen. D wid i ten iwalan amek ttabaɛen Lmasiḥ d uselmed-ines, i sen yefkan isem-agi. A naf a yagi deg Adlis-agi i d nebder, deg ixf wis 11 taseddart tis 26.
Tazwert ɣef txelqiyin
Deg ayen akk i d-yexleq Yillu, deg igenwan d lqaɛa, di tudert meṛṛa, mačči ḥala imdanen i yellan s tegzi d leɛqel. Tira iqedsen ttmeslayent-d aṭas ɣef txelqiyin nniḍen, yesɛan tigzi, yettilin deg genwan, ccɣel-nsent d leqdic zdat Yillu. Ṣṣawaḍent ɣer Yillu aked txelqit-ines s umata. Ccɣel n txelqiyin-agi, d timceggɛin ger Yillu aked txelqit-ines.
Leqraya n Tira iqedsen mačči alamma s tmusni meqqren. Yal yiwen yezmer a d-yejbed sseg-s ayen i t-iwulmen di tikli-ines di liman. S tidett, Adlis n Tira d win yuran acḥal n leqṛun, acḥal n tsuta n yemyura i yjerden deg-s. Yettawi-d aṭas ɣef umezruy d teglest taqdimt. Nezmer a d-nini belli kra n tmusni n umezruy ahat ad tɛawen di lefhama n kra n lumuṛ ɣef d-yettawi wedlis-agi; d acu kan, izen n Tira netta yeqqim-d i yemdanen meṛṛa, si yal lǧens d yal lawan. D Adlis ara nɣer s liman s lettkal. Imi deg-s ayen akk yewɛed Yillu i leslak n yemdanen.
D ayen yexdem Lmasiḥ ɣef umidag, asfel-ines, i yefkan i wemdan ttawil i s ara iqeṛṛeb ɣer ṛṛeḥma n Yillu. Ɣer umidag i yeqsed Ṛebbi ad yemlil d wemdan yellan d amednub yakan. Idammen n Lmasiḥ yuzzlen d asfel ad ssirden ddnub n wemdan taswiɛt i deg ara yeqbel asfel-nni i tudert-is d leslak-is. Ad nass ɣur-s a neqbel tikci-ines n ssmaḥ d leɛfu. Akka i yella di lebɣi n Yillu mi d-yefka Lmasiḥ d asfel i ssmaḥ.
