Tinettit n Lmasiḥ d tin icudden ɣer wayen yellan di Tira iqedsen. Imi di Tira ara naf ayen akk i t-yeɛnan. Talalit-ines ɣer ddunit s Ṛṛuḥ iqeden, tudert-is meṛṛa yellan d tin yennekmalen s tezdeg d tmusni. Leɛqel-ines yennekmalen i deg ulac akk kra n lexṣaṣ. Iɛac ger yemdanen mebla ddnub. Yeččuṛ s Ṛṛuḥ Iqedsen. Lecɣal-is d ixemmimen-is rekmen s leqdasa n Ṛṛuḥ.
S lberhanat d lecɣal yesteɛǧiben meṛṛa i yxeddem ger yemdanen, ibeggen-d tazmert n Yillu i yellan deg-s. Iteddu kan s wannuz. Imi ur yettḥiri yara ad ibeggen belli d Ṛebbi i yella. Yettaǧǧa kan lberhanat-nni i yxeddem, d netni ara yefken ṭṭabaɛ-ines.
Tirza n Yillu ɣer ddunit !
Di Lmasiḥ, Tira iqedsen qqarent-d belli d ccan n Sidi Ṛebbi i d-iqerben ɣer ddunit. S Wawal-is d Ṛṛuḥ-is. D ayen ara nɣar di Tira d wayen akk d-nnan lenbeyya s Ṛṛuḥ i ten-iseddayen. Ṛebbi d leɛnaya-ines yeqsed a d-isbeggen iman-is ɣer ddunit di Lmasiḥ. D sser meqqren. D adrig yeffren ɣef tmusni n yemdanen. Sidi Ṛebbi ibeggen-d iman-is s ṣṣifa n wemdan. Ayagi d azal n tmusni ɛlayen laqayen iɛeddan aakin i lefhama d tigzi n wemdan. D lekyasa d yekkan nnig talsa d txelqit.
D ayen i d-yenna Bulus di tebṛatt i Wat Ṛuman: " Acḥal lqayit tneflit, tekyes d tmusni n Yillu! Acḥal weɛritizarafen-is i wemḥas, d iberdan-is i lefhama. Akken yura di Tira iqedsen: Anwa i yessnen ixemmimen n Ṣidi Ṛebbi neɣ anwa i yellan d amciweṛ-ines ? Anwa i s-yefkan kra d amezwaru iwakken ad iṛǧu a s-t-id irr ? Kullec ikka-d sɣur-s, kullec illa-d yis, kullec d ayla-s. I netta tamanegt si lǧil ɣer lǧil, amin!" At Ṛuman 11:33-36.
Tazwara n linǧil n Yuḥenna degs imeslayen d ibegnen lmasiḥ yellan d Awal d ttudert i leslak n yemdanen. S imeslayen-agi, iweḥḥa-d Ṛṛuḥ i yemdanen azal n Lmasiḥ yellan d Illu s yiman-is i d-yerzan ɣer ddunit. Iswi-ines d leslak n yemdanen. Yenna-d: " Di tazwara yella Wawal, Awal yella aked Yillu, Awal yella d Illu. Si tazwara, yella aked Yillu, kullec yettwaxleq yis; deg ayen meṛṛa yettwaxelqen, ulac ayen ur d-nekki ara sɣur-s. Deg-s i tella tudert; tudert-agi tella d tafat i yemdanen. " Yuḥenna 1: 1-4.
Lmasiḥ d "Win Yellan " si zik, i lebda!
Akken d-yenna Yillu i Musa si daxel udernu n tmes: " Nekk d win yellan ", akken daɣen ara d-iqerri Lmasiḥ i Wat Israil ad asen-yini : "Nekk d Win yellan". D isem n Umeɣlal. Win yellan i lebda, d win d-ixelqen ddunit d tudert. Yenna-yasen daɣen di teswiɛt i deg testeqsayen d acu-t d wansi i d-yekka: " Uqbel a d-yili Yebṛahim, nekk lliɣ yakan! " Yuḥenna 8: 58. S imeslayen-agi yemla-d Lmasiḥ ɣef tnettit-ines. D Illu i d-yusan ɣer ddunit. Yewwi-d yid-s ṛṛeḥma d leslak. D netta i d abrid i d tudert i d leslak. Win akken yellan d Awal. D lmasiḥ, d Illu yedren.
