Ma nessaked mliḥ ɣer wazal umidag di leqraya-nneɣ di Tira Iqedsen, a naf deg-s ayen iɛeddan akkin i wudem-nni n leslak yakan.
Imi ɣer umidag iban-d deg umezruy n yemdanen wayen akken i d-iweḥḥa Yillu s timmad-is. Tadyant n umidag deg-s leslak n yemdanen si tama, aked uweḥhi n Yillu s timmad-is, si tama nniḍen. Ccɣel n umidag daɣen d “Awal”, d tabṛatt i talsa. Deg-s azamul d unamek i ddunit meṛṛa. Akken i d-ssebganen yemdanen azal-nsen d tmusni-nnsen s lecɣal i xeddmen, akken daɣen i yella umidag, d ccɣel n Yillu, d amkan i deg d ibeggen iman-is s tafat. S wesfel n Mmi-s ɣef umidag. Ayagi a ɣ-yeṣṣiweḍ a nefhem amek i ɣ-yella umidag, d azal n leslak aked uweḥḥi n tnaya n Yillu.
Ɣer umidag tban-d tmanegt n Yillu. Deg adlis n Yuḥenna, mi ara d yawi Lmasiḥ awal ɣef umidag, d wesfel-ines, yettawi-t-id s wudem n tmanegt. D anekcum di tmanegt. Am akken amidag d allel n tmanegt. S lmut n Lmasiḥ tban-d tmanegt n Yillu. Tikta-agi ad nini d ẓẓeṭṭa i s ara nefhem meṛṛa iswi d unamek ɣef yura wadlis n Yuḥenna.
Lmasiḥ yellan d “Awal” n Yillu, ibeggen-d i yemdanen lebɣi-ines i leslak. S wazal-agi n leslak ara nefhem tama meqqren n tmanegt n Yillu. Tettbin-d tmanegt n Yillu deg wayen akk i d-yexleq d leɛǧayeb meqqren d tedyanin akk ara nɣer deg mezruy n talsa. Tettbin-d daɣen deg usfel n Mmi-s ɣef umidag. Lberhanat-is d tezmert-is ur xulfen ara lekyasa-ines lqeyan. Imi asfel n Mmi-s d abeggen n lekyasa-agi aked teɣdemt. Atah wamek i tfeggeḍ tmanegt n Yillu ɣer umidag. D tamnegt i nessikid deg annuz d lmut n Lmasiḥ. D ayen iweɛren i lefhama n wemdan. Degmi lekyasa n Yillu teffer ɣef yemdanen.
Ɣer umidag tban-d leḥmala n Yillu. Yeqqar-it-id Yuḥenna deg awal-is: “ Atah wamek neɛqel leḥmala, imi yefka tudert-is fell-aneɣ”. Ulac azal n leḥmala icuban neɣ yugaren tayri n umidag. Ma ur nefhim ara azal n umidag d wesfel n Lmasiḥ, ur nettissin ara s tidett d acu-t wazal n tayri ɣer lsas-is. D tayri ur nesɛa ara leḥsab, teṣfa tbedd ɣef tidett. Deg umezruy n ddunit meṛṛa, azal n tidett yeɛnan tayri a t-nemlil ɣer umidag.
S wudem nniḍen, d tayri d yekkan sɣur Yillu. Ur d-tella ara seg umdan. D Illu i yḥemmlen imdanen, yefka-yasen-d leslak ɣer umidag. D leqsed n Yillu mačči d win n yemdanen. Yeqsed ad iceggeɛ Mmi-s ɣer ddunit, ad yili d asfel i wsuref d ssmaḥ. Ad yesbedd talwit d lehna ger yemdanen d Ṛebbi. S leḥmala i yeqsed ad isellek imdanen. Akka i d ban leḥmala.
