Yennayer n useggas-agi yegla-d s tmettant n unaẓur ɛzizen aṭas deg ulawen n yeqbayliyen d leǧnas nniḍen i t-yessnen. Wid akkit yesmeḥsisen i ccna-ines d icewwiqen-ines. Crif Xeddam yewweḍ leɛfu n Ṛebbi, di Fransa, ass n warim 23 n waggur-agi iɛeddan. Ur uwiḍent ara snat n ddurt seg imensi n yennayer.
D amɣar s leqder !
D asalas n ccna n lmusiqa. D amedyaz d acennay d win yessewzanen di lḥen s waṭas n tegzi. D tisuta n inaẓuren d icennayen i yesselmed, iɛawen-iten iwakken ad refden ula d netni ccan d tnaẓurt taqbaylit. Yenjer-d abrid i ycennayen meṛṛa n teqbaylit. D ababat-nsen meṛṛa. Ass-agini ggujlen s tidett. Aɣref aqbayli, akken ma yella, ibedd iwakken a s-yerr tajmilt yerna ad ijerred isem-is deg mezruy n ccna d tnaẓurt taqbaylit. Am ilemẓi am umɣar, d argaz neɣ d tameṭṭut, ulac win ur nḥerw ara, ur neḥzin ara s lmut n Crif Xeddam.
Isefra n tlelli !
Ccna n Dda Crif ad teqqim deg ulawen d tiɣri aked usirem n yeqbayliyen. Lḥen-is itekkes ṭṭiq ɣef ulawen. Isefra-ines d imeslayen zeddigen d-yettaken tamusni d yiseɣ.
Ayen akk i d-yeǧǧa, a d-yeqqim d « Adlis » n tmusni i umezruy-nneɣ d yidles-nneɣ.
Akal-nni i ɣef yecna ad yeǧǧuǧeg s zzerriɛa n lḥen-is d isefra-ines. Yal tizlitt yecna ad teqqim am akken d rriḥa i wsirem d tayri. Akken s-yerra tajmilt yiwen seg cennayen i t-iqerben mliḥ, yenna-d ɣef isefra n Dda Crif : “ Yal awal n usefru d aɛeqqa n tlelli...”.
D amɣar d amusnaw n teqbaylit. lmut-is a d-eǧǧ ilem meqqren ɣer yeqbayliyen d wid meṛṛa i t-iḥemlen yesmeḥsisen i ccna-ines. D acu kan, akken yebɣu yidir wemdan, lmut tella ɣef yemdanen akkit. Azal yelhan d ttrika ara d-yeǧǧ yal amdan di ddunit-is. Dda Crif yeǧǧa-d agerruj s tnaẓurt-ines d tmusni-ines.
Asirem-nneɣ akkin i lmut !
Nebɣa daɣen a d-nesmekti i yemdukal-nneɣ, asirem nesɛa. Wagi d asirem yebnan ɣef tudert ara ydumen. A d-nesmekti, d akken lmut, ɣas akka tjerreḥ ulawen mi ara tawi akka wid aɛzizen fell-aɣ, yella win i tt-iɣelben. Win akken i d-yeḥyan si ger lmeggtin ass wis tlata. Lmasiḥ ur ɣ-ittaǧǧa ara d igujilen i lebda. Asirem-nneɣ di tudert, d netta ara t-yesǧuǧgen. Ara t-yawin ɣer lɛinṣer ur nfennu. D netta i yrennun i lbenna n tudert. Axaṭeṛ Lmasiḥ yeɣleb lmut d tuccar-ines. Nessaram d akken tudert n yal yiwen a ttili ttin ara ycudden ɣer wazal n Lmasiḥ. Netta yemmut ɣef yemdanen meṛṛa, d asfel i leslak-nsen. Netta yeɣleb lmut. Yal amdan yezmer ad yesseɣzef asirem-ines, a t-yessew ɣer uɣbalu n tudert yellan di Lmasiḥ.
